Psalms 135

Wimbo Wa Sifa Kwa Mungu

1 ^aMsifuni Bwana.

Lisifuni jina la Bwana,
msifuni, enyi watumishi wa Bwana,

2 ^bninyi ambao mnatumika ndani ya nyumba ya Bwana,
katika nyua za nyumba ya Mungu wetu.

3 ^cMsifuni Bwana, kwa kuwa Bwana ni mwema,
liimbieni sifa jina lake, kwa maana hilo lapendeza.

4 ^dKwa maana Bwana amemchagua Yakobo kuwa wake mwenyewe,
Israeli kuwa mali yake ya thamani.

5 ^eNinajua ya kuwa Bwana ni mkuu,
kwamba Bwana wetu ni mkuu kuliko miungu yote.

6 ^f Bwana hufanya lolote apendalo,
mbinguni na duniani,
katika bahari na vilindi vyake vyote.

7 ^gHufanya mawingu kupanda kutoka miisho ya dunia;
hupeleka umeme wa radi pamoja na mvua
na huleta upepo kutoka ghala zake.

8 ^hAlimuua mzaliwa wa kwanza wa Misri,
mzaliwa wa kwanza wa wanadamu na wanyama.

9 ⁱAlipeleka ishara zake na maajabu katikati yako, ee Misri,
dhidi ya Farao na watumishi wake wote.

10 ^jAliyapiga mataifa mengi,
na akaua wafalme wenye nguvu:

11 ^kMfalme Sihoni na Waamori,
Ogu mfalme wa Bashani
na wafalme wote wa Kanaani:

12 ^lakatoa nchi yao kuwa urithi,
urithi kwa watu wake Israeli.

13 ^mEe Bwana, jina lako ladumu milele,
kumbukumbu za fahari zako, Ee Bwana, kwa vizazi vyote.

14 ⁿMaana Bwana atawathibitisha watu wake,
na kuwahurumia watumishi wake.

15 ^oSanamu za mataifa ni fedha na dhahabu,
zilizotengenezwa kwa mikono ya wanadamu.

16 ^pZina vinywa, lakini haziwezi kusema,
zina macho, lakini haziwezi kuona;

17 ^qzina masikio, lakini haziwezi kusikia,
wala hakuna pumzi katika vinywa vyao.

18 Wale wanaozitengeneza watafanana nazo,
vivyo hivyo wale wote wanaozitumainia.

19 ^rEe nyumba ya Israeli, msifuni Bwana;
ee nyumba ya Haruni, msifuni Bwana;

20 ee nyumba ya Lawi, msifuni Bwana;
ninyi mnaomcha, msifuni Bwana.

21 ^sMsifuni Bwana kutoka Sayuni,
msifuni yeye aishiye Yerusalemu.

Msifuni Bwana.